Música
ACTIVIDADES DE REPASO: TRIVIAL MUSICAL
Esta semana propóñovos un xogo de repaso final antes de que remate o curso: un TRIVIAL MUSICAL co que repasaremos ritmo, audición, figuras, instrumentos...
Quizáis a parte máis difícil sexa a de compositores porque non nos deu tempo de ver moitos pero non vos desanimedes!!!
MOITA SORTE!!
ACTIVIDADES DE MÚSICA
Esta semana faremos un repaso xeral dos aspectos máis importantes do curso con dous cuestionarios.
Os/As de 1º, 2º e 3º só tedes que facer o voso cuestionario.
Os/As de 4º, 5º e 6º tedes que facer os dous.
Cando os fagades, mandádeme ao correo floragrande@gmail.com o "pantallazo" final, onde se ve se superástedes a actividade ou non.
Por último, como levamos dúas semanas facendo percusión corporal, esta semana cambiamos e propóñovos uns bailes de "Just Dance".
Para os máis pequenos que vos parece mover o corpo a ritmo de Baby Shark?
Para primaria a proposta é High Hopes do grupo Panic!
Non fai falla que enviedes vídeo nin imaxes destes bailes porque é soamente para que vos divirtades e vos movades un pouco a ritmo e así tamén dou tempo aos que tedes actividades pendentes de poñervos ao día.
SAÚDOS MUSICAIS!!
ACTIVIDADES DE MÚSICA
Esta semana en música os de 1º, 2º e 3º repasaremos a CLAVE DE SOL, o PENTAGRAMA, as NOTAS e as FIGURAS cos exercicios que tedes a continuación.
Os de 4º, 5º e 6º repasaremos os MATICES e o TEMPO.
Podedes recordalos nestas táboas antes de facer as actividades.
Tamén podedes facer as actividades de 1º, 2º e 3º para repasar. Nunca sobra!
Por último déixovos este vídeo para INFANTIL e PRIMARIA.
Como a semana pasada recibín uns vídeos estupendos da Marcha Turca de Mozart, esta semana propoño unha obra de Beethoven: Contradanza nº 5 que podedes enviar ao meu e-mail: floragrande@gmail.com
MOZART E BEETHOVEN
As tarefas de música desta semana están relacionadas con dous dos compositores máis importantes da historia da música:
WOLFGANG AMADEUS MOZART e LUDWIG VAN BEETHOVEN
A continuación, déixovos uns vídeos para que recordedes as súas biografías.
ACTIVIDADES PARA PRIMARIA
(O alumnado de 1º, 2º, 3º e 4º NON ten que facer a actividade rodeada de vermello)
Por último, deixo este vídeo para que tanto o alumnado de INFANTIL coma o de PRIMARIA practiquedes percusión corporal coa "Marcha Turca" e cando vos saia ben, se queredes, podedes enviarmo coma sempre ao correo floragrande@gmail.com.
ACTIVIDADES DE MÚSICA: FAMILIAS DE INSTRUMENTOS
Esta semana en Música repasaremos as FAMILIAS DE INSTRUMENTOS.
Acordádesvos delas?
Son 3: corda, vento e percusión.
Nos seguintes enlaces atoparedes xogos interactivos para que as practiquedes e as repasedes.
Son xogos sinxelos que podedes facer tod@s.
Espero que o pasades ben ao tempo que as traballades!!
Ademais como tarefa para esta semana, deberedes construír un instrumento caseiro con materias que teñades por casa.
Para que vos inspiredes déixovos uns enlaces dos que podedes sacar ideas.
Cando os teñades mandade unha foto ou un vídeo tocando ou cantando á dirección floragrande@gmail.com
ENLACES PARA A CONSTRUCIÓN DUN INSTRUMENTO CASEIRO
ACTIVIDADES DE REPASO: NOTAS E ALTURA
Esta semana faremos exercicios de repaso das NOTAS e a ALTURA DO SON.
A continuación déixovos diferentes xogos cada un deles con diferentes niveis, para que poidades practicar cada un ao voso nivel; pero antes de comezar... repasade as notas un pouco!
Para o alumnado de infantil deixo unha das cancións que utilizamos
na clase para cantar a escala musical.
ACTIVIDADES DE REPASO: RITMO
A continuación déixovos uns enlaces a diferentes actividades para repasar a parte de música relacionada co RITMO.
Nos xogos hai diferentes niveis para que poidades escoller cada un o voso.
Se vos animades, practicade os vídeos e mandádeos ao correo da biblioteca para ver que ben o estades facendo:
TROUPELEAR: Obradoiro de cantigas de Nadal e Reis - ANPA (4/12/2019)
Troupelear: un pouco de cantar, bailar, tocar e xogar!!
Iso foi o que fixemos hoxe da man de Branca Villares e Pablo Pintor, mestres de música que viñeron ao colexio a compartir con nós un Obradoiro de Cantigas de Nadal e Reis, organizado pola ANPA a través da FAPACEL (Federación de ANPAs de Lugo).
Acompañados por instrumentos tradicionais galegos como a gaita, a zanfona, a pandereita, o pandeiro cadrado e, por suposto, as súas voces; eles fixeron un obradoiro moi participativo no que cantamos e xesticulamos diferentes panxoliñas como podedes ver nos seguintes vídeos:
Ademais tamén houbo tempo para aprender uns pasos de muiñeira que acabamos bailando en dous grandes grupos:
MOITAS GRAZAS A ANPA POLA ORGANIZACIÓN DESTA ACTIVIDADE,
PODEMOS REPETIR CANDO QUEIRADES!!!
SEMANA DA MÚSICA 2019: A PERCUSIÓN
Con motivo de Santa Icía, patroa da música, celebramos por sétimo ano consecutivo a Semana da Música.
Durante toda a semana, celebrouse un certame na biblioteca no que cada día ían aparecendo diferentes probas para que o alumnado investigara e averiguara moitas cousas sobre a familia de instrumentos aos que se lle adicou este ano a semana musical: A PERCUSIÓN.
Para rematar as actividades, tivemos no centro a José Luís García, Profesor Superior de Percusión no Conservatorio Meste Ibáñez.
El ensinounos moitas cousas sobre estes instrumentos e puidemos coñecer de cerca varios membros da familia. Comezamos coa caixa, nunha interpretación na que descubrimos as súas posibilidades sonoras xa que non só a tocou coas baquetas como estamos acostumados a oíla senón que tamén o fixo cos dedos e as unllas!!
Continuamos coa Marimba, quizáis un dos instrumentos de percusión de altura determinada máis coñecidos. Para presentala, ademais de escoitar ao noso convidado, desfrutamos tamén dun dúo coa nosa alumna Laura.
Outros instrumentos que xa coñeciamos no cole pero que José Luís nos presentou de forma máis profesional foron os instrumentos de pequena percusión: güiro, maracas, pandeireta, claves....
E tamén aprendemos a diferenza entre caixa, tambor e tamboril que aínda que parecen semellantes son diferentes.
Outra cousa que aprendemos hoxe foron os diferentes tipos de baquetas que existen dependendo do instrumento que vaiamos a tocar ou dos efectos que queiramos acadar.
Para rematar o concerto non podía faltar a batería, o instrumento que máis lles chama atención aos nenos e nenas e co que o pasaron xenial!
Ao finalizar o concerto, José Luís entregou os premios ao alumnado gañador do certame de investigación, que incluía un punto de lectura cunha clave de sol da nosa impresora 3D (https://www.thingiverse.com/thing:2269324)e tamén lle entregamos a el unha peza de alfarería de Gundivós para agradecerlle a súa presenza neste concerto didáctico.
E non podíamos dar por rematada esta actividade sen que o noso convidado pasara polos estudos de Radiuvín para compartir cos seus alumnos Laura e Darío unha entrevista que podedes escoitar no seguinte podcast. Ademais outra razón pola que tiña que pasar por Radiuvín é que varias das sintonías da nosa emisora (como a de Sobericias) son da súa autoría.
E AGORA, SE QUEREDES VER MÁIS MOMENTOS DESTA ACTIVIDADE,
PODEDES FACELO PREMENDO NA GALERÍA DE IMAXES.
FELIZ DÍA DE SANTA ICÍA!!!
CONCERTO DIDÁCTICO (31/5/2019)
O noso alumnado xunto co alumnado do CEIP Monte Baliño de Pantón, do CEIP A Gándara de Monforte e do PAI de Sober; aistiu ao concerto didáctico organizado pola Banda de Música de Sober, as Escolas Municipais de Música e Teatro e o Coro Berea.
Neste concerto disfrutamos dunha adaptación do conto musical La vía de los sueños de Josu Elberdin e ao rematar, varios mestres e alumnos convertéronse momentaneamente en directores da banda.
Tras o concerto, Ruth González (directora do Coro Berea) e Miguel Franqueiro (director da Banda de Música de Sober) acudiron aos nosos estudios de Radiuvín para falar sobre varios aspectos organizativos e musicais do evento así como das súas experiencias musicais e levaron como agasallo un punto de lectura de Lectuvín e unha clave de sol impresas coa nosa impresora 3D.
Esta actividade tamén foi recollida pola prensa local:
 |
| El Progreso |
 |
| La Voz de Galicia |
