Saídas didácticas

Mércores 8 de marzo de 2017

Con motivo da celebración do Día internacional da Muller, as alumnas e alumnos de 6.º de Primaria, xunto coa titora e a directora, asistimos a un pleno no Parlamento de Galicia, no que tamén estivo presente a ONG Plan Internacional para dar visibilidade ás mulleres.

Ademais de escoitar o pleno, tivemos a oportunidade de facer unha intervención. Iria, a nosa portavoz, leu un escrito elaborado por toda a clase onde defendemos e reivindicamos os dereitos das mulleres e nenas.

Previamente, os representantes de dita ONG, estiveron no centro para explicarnos a difícil situación na que se atopan moitas mulleres e nenas do mundo. Agasalláronnos cunhas pulseiras co lema "Por ser nena", un bolígrafo, unha camiseta, un pano e o libro "Icía quere cambiar o mundo". 

Todos os alumnos e alumnas, coincidimos en que foi unha experiencia marabillosa, moi significativa e que non esqueceremos facilmente.

(Podedes acceder á galería premendo nas fotografías)

Mércores 8 de febreiro de 2017

Esta mañá, os alumnos/as de 3.º e 4.º de Primaria fixeron unha saída a Pontevedra.

A primeira parada foi no Café Moderno. Na galería que dá ao xardín, a monitora faloulles sobre a arquitectura, nomeando a coñecidos arquitectos pontevedreses como De la Sota, ademais de amosarlles vídeos, mapas e planos. Logo, en pequenos grupos, os nenos/as fixeron un deseño de como sería para eles a súa aula ideal, empregando regras, compases, etc.

Ao rematar merendaron tranquilamente antes de ir ao teatro de AFundación a ver a obra: "Sandra e Meirol en Xistralia".

Dita obra acontece en Xistralia, un pequeno pobo situado ao sur de Galicia e norte de Portugal. Alí, os veciños/as estaban a preparar a Festa da Coca, e ensaiaban tocando diversos instrumentos musicais.

Nesa vila tamén vivía un parente da Coca, un monstro con dúas cabezas que se adicaba a raptar aos nenos e nenas para estragar dita festa.

Entón, chegou a Xistralia unha rapaza viaxeira que non sabía nada diso e, malia ser advertida polos veciños/as, remata sendo secuestrada polo monstro. Sen embargo, gracias a ela, descóbrese que non era tan malo como todos pensaban, e que soamente raptaba aos nenos/as porque se sentía moi só e quería compañía.

En xeral, a obra gustoulles moito, xa que resultou dinámica, participativa e animaba aos rapaces/as a subir ao escenario e formar parte da representación.

   Martes 27 de setembro de 2016

VISITA A PUNTA MOREIRA (O GROVE)

     (Proxecto "O sabor da aventura está no mar")

O 27 de setembro de 2016 o alumnado e profesorado de Educación Infantil e 1º, 2º e 3º de Primaria viaxamos a Punta Moreira (en O Grove) para aprender "in situ" moitas cousas sobre o sector productivo da pesca e marisqueo e varias curiosidades sobre algúns dos peixes e produtos mariños que habitan as nosas rías. 

-Visitamos as instalacións da Piscifactoría de rodaballo. Había moitíííísimos rodaballos de diferentes tamaños distribuidos en distintas "piscinas" segundo a súa idade e tamaño. Os monitores contáronnos moitas curiosidades sobre esta especie de peixe e a súa cría e coidados na piscifactoría.

Deixáronnos darlles de comer e procuramos non facer moito barullo para non estresalos.

- Moi preto de alí estaba o Museo de Salazón e o Museo de Pesca. Nestes lugares puidemos coñecer como antigamente se conservaban as sardiñas grazas á salgadura; puidemos ver moitos apeiros e ferramentas antigas e actuais que os mariñeiros/as e mariscadores/as empregan para faenar con diferentes artes de pesca. Mesmo había algunhas que xa están en desuso por estar prohibidas. Tamén vimos algunhas das roupas que antigamente empregaban para traballar no mar, restos de algunhas especies mariñas, algúns fósiles, algunhas barquiñas, etc.

Vimos un vídeo no que aprendemos moito sobre como se pescan algunhas especies mariñas das nosas rías como a navalla, o polbo, etc.

- Finalmente e ben provistos dos nosos mandís e gorros de cociñeiros e cociñeiras desfrutamos xuntos dunha deliciosa merenda mariñeira.

Antes de irnos todos recibimos unha gorra de "O sabor da aventura está no mar" e sorteáronse tres camisetas entre o alumnado participante na saída. Os agraciados foron: Goyo, María e André.

Ademais de aprender moito pasámolo moi ben no que foi unha intensa mañá.

Días despois, xa no colexio, todos recibimos o noso diploma de participación na actividade.  

Podedes ver toda a xornada premendo en calquera das

fotografías!!!