Prezadas Familias do Escultor Acuña:
Como ben sabedes, o xoves 10 de setembro está fixado o comezo do curso escolar 2020-2021. Todos somos conscientes do reto que supón levar adiante este curso novidoso e cheo de dúbidas, inseguridades e incertidumes. Dende o equipo docente e dende a ANPA estivemos traballando ao longo deste verán en planificar unha volta segura. Todos (equipo docente, persoal non docente, familias e alumnado) necesitamos un entorno de confianza no que os procedementos de prevención estean moi definidos. A saúde física e emocional será o primeiro criterio de atención e xestión organizativa e educativa.
As Consellerías de Educación e Sanidade publicaron conxuntamente un Protocolo de Adaptación á Situación COVID-19 na que os centros estamos a traballar ao mesmo tempo, que solicitamos continuas melloras no mesmo dende o noso Consello Escolar. A última versión do Protocolo ten data de onte, 31 de agosto, na que se adoptan as medidas do acordo co Ministerio de Educación e Sanidade.
No inicio do curso haberá moitos cambios organizativos (entradas, saídas, medidas de distanciamento, grupos estables de convivencia, etc). Para poder coñecer e integrar este novo modelo temos pensado convocarvos na primeira semana de setembro, en grupos reducidos, co obxecto de darvos a coñecer os tres documentos básicos que regularán a nosa actividade:
- Plan de Adaptación á Situación COVID-19
- Plan de Continxencia Sanitaria e de Educación a Distancia
- Plan de Acollida Inicial e Emocional ao novo curso
A día de hoxe todavía quedan pendentes cuestións sen resolver que dependen das negociacións e acordos posibles entre outras institucións (ANPA, Consellería de Educación) como son a organización do comedor, da aula matinal e das actividades extraescolares. Dende o centro desexamos que se solventen estas demandas que consideramos básicas para garantir unha escola segura e de calidade. Dende o equipo directivo e o Consello Escolar daremos conta da evolución destas demandas.
Mentres tanto, o equipo docente xa está de xeito presencial nos centros dende hoxe, martes 1 de setembro, e está planificada unha sesión extraordinaria do Consello Escolar para o día 2 co obxectivo de consensuar e difundir a nova normativa organizativa.
En breve, teredes información precisa do calendario de reunións para comentar a nova organización do centro. Ese mesmo día serán entregados os cheques de libros e material escolar.
Aínda que será tratado nas reunións coas familias, queremos solicitar, máis que nunca, acolaboración e do compromiso de toda a comunidade educativa para que superemos o novo reto con confianza, seguridade e ilusión polo que vos pedimos moita paciencia ao comezo de curso, implicación e concienciación para o cumprimento riguroso das normas que todos e todas deberemos adoptar.
Nada máis dende o voso cole. Imos informando de todas as novidades que vaian xurdindo. Moita saúde e prevención.
Atentamente, o equipo educativo