En 1º imos aprendendo as letras pouco a pouco. Tamén traballamos a grafomotricidade, tan necesaria para facer ben as letras, porque están cheas de liñas: rectas, zig-zag, ondas... Usamos dous dados, un indicábanos a cor e outro o tipo de liña a facer.

Fixemos letras de plastilina, letras no aire, letras con cordas, letras nas costas dun compañeiro para que as adiviñara...e ata usamos limpapipas para facer letras.

Para ler temos axuda dunha culler que se vai colocando antes ou despois da vogal para formar sons.

E para escribir as letras ben na pauta contamos coa axuda de Xafi, Tortu e Monito. Eles son os guardiáns das letras e cada un encárgase de presentarnos as súas letras: Xafi encárgase das letras que son altas coma ela e saen das liñas por arriba; Tortu das letras que non saen das liñas, nin por arriba nin por abaixo; e Monito preséntanos as letras ás que lles gusta colgarse nas pólas das árbores como fai el, cara abaixo.

Para darnos conta de que vivimos rodeados de letras e palabras e estar ben atentos a atopalas, entre todos,primeiro e segundo, estamos a facer un libro para a nosa biblioteca de aula. Seguimos a completalo,logo encadernarémolo e veremos o resultado.

Así imos aprendendo a ler e escribir pasiño a pasiño. Desde casa, pódese axudar utilizando as situacións reais da vida cotiá para que os nenos lean e escriban: que apunten algo na lista da compra, que deixen unha nota a alguén, que fagan listas do que queiran, que teñan libros e revistas á súa disposición,etc.