AS MOCHILAS VIAXEIRAS DESPEGAN EN 3, 2, 1…
Hoxe, xoves 24 de outubro de 2024, conmemoramos, un ano máis, o Día das Bibliotecas!!!
E que mellor idea que ir á Biblioteca Municipal de Cenlle coller uns libros de préstamo e ver unha obra de teatro!!! (en próximas publicacións veredes nas fotos que ben o pasamos todos alí, nenos/as e profes!).
Ademais, para celebralo polo alto, mañá, venres 25 de outubro, faremos despegar as Mochilas Viaxeiras do cole!!!! Tedes ganas? Están cargadas de novas aventuras, historias e recursos marabillosos que vos van fascinar!
Mañá porémolas en marcha, pero debedes lembrar varias cousiñas importantes…
Primeiro, que poderedes gozar delas durante 15 días, así que dentro de 2 semanas debedes traelas de volta ao colexio para que outra compañeira ou compañeiro da vosa clase poida levala tamén para a súa casa.
Segundo, máis importante aínda, tedes que coidar a Mochila e o material que leva dentro.
Finalmente, traemos unha novidade deste curso. Na Mochila Viaxeira, veredes unha pequena libreta. Cando rematedes de ler/ver todos os materiais, debedes facer o seguinte:
Nunha páxina (ordenadamente, sen saltar follas) poredes a data e o voso nome, e debaixo diso podedes elixir entre: facer un debuxo do que máis vos gustou (pode ser o libro, personaxes…), pegar unha fotografía vosa lendo, escribir unha pequena reflexión de cal foi o voso recurso favorito e por que… Ademais, podedes escribir o nome dalgún libro que vos gustaría que estivese na Mochila ou na biblioteca.
Preparados/as? As Mochilas Viaxeiras despegan en 3, 2, 1…
