O Centro Educativo de Educación Infantil e Primaria (CEIP) de Belesar acolle dende este luns e ata o 2 de marzo a exposición “Mulleres Galegas na Historia”, na que faise unha homenaxe á vida de dezaseis mulleres que marcaron a historia de Galicia.
O alcalde, Ángel Rodal, e o deputado de Cultura e Lingua, Xosé Leal, participaron na inauguración da exposición na que os alumnos de Belesar ofreceron unha representación como acto previo á apertura da mostra, que ten como obxectivo poñer en valor o esforzo e sacrificio de mulleres que loitaron ao longo da historia co fin de conseguir mellorar a situación feminina da época.
Rodal agradeceu a implicación dos escolares e destacou o papel das mulleres homenaxeadas na loita pola igualdade. Á inauguración asistiron os alumnos do centro escolar, así coma unha ampla representación da Corporación de Baiona, entre eles as concelleiras de Cultura, Educación e Benestar Social e concelleiros da oposición.
Este ano o centro educativo traballa como tema central a igualdade, polo que decidiu poñer en marcha esta actividade enmarcada no Plan Municipal de Igualdade do Concello de Baiona e realizada en colaboración coa Deputación de Pontevedra a través das áreas de Educación, Cultura e Igualdade.
A exposición estará aberta ao público e todos os interesados poden visitala de luns a xoves en horario de 16:00 a 18:00 horas.
María Balteira, Inés de Castro, María Castaña, María Pita, María Soliña, Concepción Arenal, Emilia Pardo Bazán, Filomena Dato, La Bella Otero, Ernestina Otero, Maruja Mallo, Enriqueta Otero, María Antonia Dans, María Casares, Xela Arias, Julia Minguillón e Rosalía de Castro son as mulleres homenaxeadas.
