Neste curso o Departamento de Orientación, coordinado pola Orientadora, está composto por dúas mestras de Pedagoxía terpéutica (unha delas itinerante) e dúas mestras especialistas de Audición e Linguaxe, e ao longo do mesmo temos a finalidade de acadar a cooperación de toda a Comunidade Educativa para facilitar o benestar emocional, o desenvolvemento persoal, social e académico dos vosos fillos e fillas.
A Orientadora é un membro do equipo docente que vos pode asesorar na labor educativa e orientarvos na procura de solución aos problemas que poidan xurdir, podendo contar coa súa axuda para todo o que precisedes tanto no correo orientacionarealonga@gmail.com como a través do teléfono do centro.
Comezamos un novo curso cheo de proxectos e ilusión, desexando que todo o noso alumnado veña con moitas gañas de aprender e desfrutar.
Cada inicio de curso ven acompañado dun montón de nervios, medos, incertidumes... Para facilitar a adaptación dos vosos fillos e fillas á escola non vivades con ansiedade este momento , evitade transmitir os vosos medos e inquedanzas, amosando unha actitude tranquila e alegre ante a volta á escola.Facede comentarios positivos cara a escola e as aprendizaxes. Vir ao colexio é unha sorte!. Amosade interese e valorade positivamente as actividades realizadas na escola.
Estimulade desde a casa todo o potencial dos vosos pequenos, facilitade o seu desenvolvemento cognitivo, motriz, da linguaxe, a súa progresiva autonomía persoal, desenvolvemento social e emocional. Dedicádelle tempo, xogade e desfrutade xunt@s. E ao longo de todo o curso mantede unha comunicación constante cos profesores ante calquera dúbida para garantir un desenvolvemento integral dos vosos fillos e fillas.
