Na semana do 4 ao 8 de abril celebramos no colexio a “Semana da Saúde”, consistente na realización de talleres relacionados con hábitos de alimentación saudable. Estas actividades están promovidas polo Concello pola nosa participación no Programa SI, de Saúde Integral.

Comezamos o luns co alumnado de educación infantil, que participou nos seguintes:

 -3 anos: taller de froitas

 -4 anos: taller de iogur

 -5 anos: taller de minipizzas

Primeiramente atenderon una pequena explicación das monitoras, despois puxéronse “mans á obra”, e finalmente degustaron as súas elaboracións. MMmmmm!!!!

O martes recibimos a tan ansiada visita de CARDIO, que saudou e bailou con todos e todas. Ademais agasallounos cunhas “gominolas saudables” , feitas con zume de froita natural. Todos disfrutaron enormemente con esta visita coa que soñan durante todo o curso.

 E remataron cun contacontos que versaba sobre as emocións (outro dos temas que se traballan no programa). Neste conto titulado “5 ENFADOS” un neno chamado Carlos estaba moi enfadado, irritado, alporizado…por 5 motivos:

 1.-porque papá non lle mercaba un xeado

2.-porque mamá non tiña tempo para xogar con el

3.-porque a súa irmá rompéralle o seu xoguete favorito

4.-porque tiña que deitarse cedo

5.-PORQUE SI!!!!

Logo de consultar con varias bruxas, todas lle deron a mesma receita: coller aire fortemente polo nariz , expulsalo pola boca e contar ata 10. E así foi como Carlos aprendeu a controlar os seus enfados.

 A continuación podedes ver as fotos destes días.

O pasado 6 de abril recibimos no cole a esperada visita de CARDIO (como xa sabedes, a mascota do programa SI!, programa  que levamos a cabo no centro).

Cardio foi recibido, en 3 sesións diferentes, polos nenos e nenas de 3, 4 e 5 anos. No patio de entrada, colocado  cada grupo en liña, enfrontados e cunha distancia entre grupos de 4 ou 5 metros, Cardio  saltaba, corría, saudaba aos nenos e ás nenas e bailaba ao son da música, incitando a todos a moverse como el. O monitor que o acompañaba explicoulles a importancia de coidar o corazón comendo moita froita e verdura, asi como facendo deporte. Despois, Cardio repartiulles un agasallo: unha bolsiña con 4 gominolas que, aínda que podan parecer pouco saudables, están feitas con zume de froita natural 100% .Finalmente retratouse con  cada grupo e despediuse ata o vindeiro ano pedindo a todos os nenos e nenas o compromiso de protexer e coidar cadanseu corazón.

Catro nenas de 5 anos entregáronlle uns debuxos que lle fixeron como agradecemento en canto souberon que viría facernos a visita. 
Tamén estiveron presentes as cámaras de TELEMIÑO facendo unha pequena gravación que se emitirá na TV. 

O alumnado de 3 anos mostrouse moi sorprendido ante o tamaño de Cardio e, como cabía esperar, expectante e comedido. Os demais grupos, nerviosos, pero moi participativos porque xa son coñecedores deste experiencia. Todos gozaron un montón. Foi un "alborotado" día de regreso ao cole despois das vacacións.

Transcribimos un dos últimos comunicados da FUNDACIÓN SHE que, a través dun conto, nos fala da importancia dos pequenos cambios que poden xerar un gran impacto:

"Sara, Hugo e Elvira viven a súa vida sen ser conscientes da influencia que as súas accións, pensamentos e emocións poden chegar a provocar noutras persoas.

E é que, ás veces, unha decisión que se vai cociñando durante un tempo, un pensamento que nos ronda a cabeza ou unha conversa que tiñamos pendente, ocorren e xa non podemos parar a cadea de marabillosos sucesos que os seguen.

Así é o cambio de hábitos e así é o coidado da nosa saúde, aparentemente individual, pero enormemente social.

Isto é o que quixemos recoller neste novo conto, inspirado nos valores e metas da Fundación SHE no que puxemos o cariño e o coñecemento do equipo, coa intención de reflectir a importancia do contorno e a sociedade, no voso caso do ambiente escolar.

Animámosvos a seguir traballando pola promoción da saúde no alumnado, no profesorado, nas familias e no centro, como comunidade, nun momento no que a prevención dunha enfermidade cobra tanto protagonismo."

Alimentarnos de forma saudable, realizar actividades física acotío e aprender a identificar e xestionar as nosas emocións son as claves para nos manter fortes e estables nun momento no que nos precisamos sans e positivos. E coa axuda do grupo estes cambios son máis doados de conseguir.

Enlace ao conto:

- SARA, HUGO E ELVIRA  

Un ano máis seguimos traballando co PROGRAMA SI! que, como xa todos sabedes, promove a fundación SHE do doctor FUSTER. 

Nas seguintes liñas a Fundación Si! recordanos os fundamentos do programa: 

O Programa SI! nace cuns piares robustos, que o levan a ser hoxe un programa de promoción da saúde integral, sólido, efectivo e ben valorado:

A súa sólida base científica levounos a realizar estudos cos que validar a súa eficacia en cada unha das etapas nas que intervén, nos que se están obtendo resultados positivos.

O centro da intervención é a promoción do coidado do corazón no  alumnado, favorecendo non só a súa interiorización desde a teoría (coñecemento), senón tamén promovendo o desenvolvemento dunha visión positiva e activa da saúde persoal (actitude), e desenvolvendo uns comportamentos saudables no seu día a día (hábitos).

Para conseguilo sabemos que é imprescindible a colaboración e unidade dos diferentes contextos e persoas que os acompañan, polo que para conseguir un cambio xeneralizado e permanente nos seus hábitos de vida intervimos en catro niveis diferentes e interconectados:

• A aula, con materiais didácticos elaborados para seren utilizados de forma transversal desde diferentes áreas.*
• O profesorado, ao que se lle ofrece unha formación voluntaria e acreditada sobre a promoción da saúde cardiovascular.
• O ambiente escolar, para acadar un cambio permanente na identidade do centro.
• As familias, para a súa sensibilización e maior coñecemento sobre a saúde e a xeneralización dos novos hábitos de vida máis aló do centro educativo.  

Que contidos se traballan?

A ciencia médica demostrounos que a saúde do corazón depende en boa medida de termos uns hábitos de vida saudables que teñen moito que ver cos tres compoñentes que se traballan no Programa SI!:

• Alimentación saudable: que, como e canto comemos.
• Vida activa: canto e como nos movemos.
• Factores de protección ante o consumo de substancias: que sentimos e como o xestionamos. 

O 22 de xaneiro unha nova sobre o centro volveu a aparecer no xornal LA REGIÓN, concretamente na súa sección XORNAL ESCOLAR. Un equipo da canle de televisión local TELEMIÑO achegouse ao colexio para observar as actividades que realizan os máis pequenos dentro do programa SI (SAÚDE iNTEGRAL) que, como xa sabedes, levamos a cabo dende a súa posta en marcha polo Concello de Ourense en colaboración coa fundación SHE do doctor Valentín Fuster.

Cada semana os nenos e nenas realizan actividades sobre hábitos saudables, centrados sobre todo no coidado da saúde cardiovascular, e que se basa en tres principios: alimentación saudable, exercico físico e control das emocións.  

Os nenos e nenas pasárono estupendamente mentres os filmaban realizando as actividades, tamén respostaron ás preguntas que lles fixeron e cos seus comentarios explicaron como debemos coidar o noso corazón. 

Moitas das actividades que realizan os máis pequenos fanse en colaboración coas súas familias. Aproveitamos para dar as grazas a todas as familias que colaboran e se implican nesta e noutras tarefas, a colaboración entre casa e colexio xa saben que é fundamental.  

Nuns recunchos do colexio temos a exposición sobre almorzos e merendas saudables que realizaron os pequenos nas súas casas. Na seguinte presentación podedes velas e tamén momentos da gravación do programa XORNAL ESCOLAR. 

Tamén podedes ver o vídeo do programa que se emitiu na canle de televisión local TELEMIÑO:

Como informamos nunha anterior entrada, dentro das actividades promovidas polo PROGRAMA SI!! (SAÚDE INTEGRAL), terían lugar uns obradoiros sobre alimentación dirixidos á profesores e pais/nais. 

Celebrado xa o obradoiro realizado polo profesorado, agora queremos invitarvos á celebración do obradoiro dirixido a vós, pais e nais, e que axudará á mellor comprensión da saúde e dos motivos polos cales temos que coidar dela.

OBRADOIRO: DA ALIMENTACIÓN Á NUTRICIÓN 

MARTES, 19 DE NOVEMBRO ás 18:30 no centro 

ESPERAMOS CONTAR COA VOSA PARTICIPACIÓN!!! 

Igual que xa comezamos co programa de VOZ NATURA, xa comezamos tamén a traballar co PROGRAMA SI, SAÚDE INTEGRAL, que recordamos:  "é un programa de intervención escolar dirixido a nenos e nenas de 3 a 16 anos cun claro obxectivo: demostrar que a adquisición de hábitos saudables dende a infancia reduce os riscos das enfermidades cardiovasculares e mellora a calidade de vida na idade adulta".

E tamén coma en anos anteriores comezamos coa carta que o Doctor Fuster vos envía ás familias para animarvos a colaborar co programa:

Unha das novidades deste curso é a realización duns obradoiros de formación, para profesores e tamén para pais e nais. 

O pasado 1 de outubro xa tivo lugar no centro o taller dirixido ao profesorado: "AUTOXESTIÓN EN SAÚDE: DA ALIMENTACIÓN Á NUTRICIÓN". Impartido pola doctora Estefanía Zardoya Cabo, médica especialista en medicina de familia e comunitaria e coach polo ICC., combinando teoría con práctica e auto-reflexión. Estes foron algúns dos obxectivos propostos:

- Tomar consciencia do proceso da nutrición. Pasar de vivir para comer a comer para vivir.

- Reflexionar sobre os coñecementos sobre nutrición: proporcionar puntos claves con evidencia científica.

- Información actualizada sobre conceptos básicos en nutrición.

- Axudar a integrar os coñecementos na nosa vida cotiá. 

  (Nota sobre o obradoiro no xornal La Región o 2-10-2019)

Agora queda pendente de realizar o obradoiro dirixido aos pais e nais. En canto coñezamos a data de celebración seredes avisados. Contamos convosco, a vosa participación é fundamental para que continuedes nas casas cos hábitos saudables que dende a escola queremos inculcar aos nenos e ás nenas. 

Lembrade entrar tamén na páxina web do programa: https://www.programasi.org/. Alí atoparedes materiais e recursos que vos axudarán a fomentar un estilo de vida saudable. 

 As claves de acceso para as familias:

 Usuario: FAM32008458

 Contrasinal:   FAM32008458NS

·        

O pasado 1 de abril recibimos no colexio a visita de CARDIO, a mascota do programa SI! (Saúde Integral), programa, que como xa sabedes, levamos a cabo dende fai sete anos. Cardio quixo pasar unha xornada divertida cos pequenos e pequenas de infantil cos que cantou e bailou, fíxose un montón de fotos e deulles un montón de abrazos. Logo obsequiounos cunhas lambetadas saudables. Que ben o pasaron todos!!

Recordade que o PROGRAMA SI! é un programa de intervención escolar dirixido a nenos e nenas dende 3 ata 16 anos con un claro obxectivo: demostrar que a adquisición de hábitos saudables dende a infancia reduce os riscos das enfermidades cardiovasculares e mellora a calidade de vida na idade adulta. Son catro os pilares básicos sobre os que se asenta este programa, promovido polo doctor Fuster mediante a Fundación SHE:

• Hábitos saudables de alimentación.
• Fomento da actividade física.
• Coñecemento do corpo humano.
• Xestión das emocións. 

 Deixámosvos os enlaces as guías do programa de educación infantil e de educación primaria:

- GUÍA EDUCACIÓN INFANTIL

- GUÍA EDUCACIÓN PRIMARIA 

Un ano máis continuamos desenvolvendo o PROGRAMA SI (SAÚDE INTEGRAL) promovido polo doctor Valentín Fuster a través da Fundación SHE.

Este ano xa están implicados todos os cursos, tanto de Educación Infantil, como de Educación Primaria (recordamos que empezamos no curso 2012-2013 cos pequenos e pequenas de 6º de Educación Infantil que agora xa están en 6º de Educación Primaria!!). Un amplo percorrido onde fomos aprendendo, tanto na escola coma nas casas (mediante os boletíns, retos e actividades que íamos enviando), que a saúde é cousa de todos e que un estilo de vida saudable, dende os primeiros anos da nosa vida, favorecerá a prevención de enfermidades cardio-vasculares e mellorará a nosa saúde en xeral. 

Para comezar esta nova andaina, hoxe deixámosvos a Guía Si, onde teredes toda a información sobre o programa para axudarvos a entender mellor o seu sentido e a súa filosofía.