EDLG: Actividades

DÍA DO LIBRO 2022

O luns celebramos o DÍA DO LIBRO.

Os nenos e nenas de 3º a 6º de primaria convertéronse para a ocasión en padriños e madriñas lectores/as para lerlles contos aos máis pequenos.

A actividade levouse a cabo en distintos lugares do patio e no salón de actos, polo que moitas zonas se converteron en fermosos espazos para a lectura.

A actividade gustoulles moito a grandes e pequenos e foi moi emotivo ver como todos e todas gozaban dese rato de lectura na que a maioría leron e escoitaron máis dun conto.

Rematado o rato da lectura tiñan en dúas zonas do colexio libros que se expurgaron da biblioteca para que escolleran algúns e darlles unha segunda vida nos seus fogares.

Había para todos os gustos lectores polo que todos e todas atoparon algún que fose do seu interese.

Deixámosvos aquí un vídeo coas imaxes que deixou o día.

Con motivo do Dia Internacional das Mulleres 8M, o grupo Trinketrinke teatro representou no salón de actos do colexio unha versión do conto tradicional "A ratiña presumida", no que se fomentan os estereotipos de xénero e as ideas sexistas, dun xeito diferente.

Nesta actividade, á que asistiron os alumnos e alumnas de educación infantil, dáselle a volta ao conto clásico para amosar a un ratiño -o rato Fuco- que disfruta cantando e limpando a súa casa, e para visibilizar a unhas mulleres empoderadas -neste caso animais- que non teñen ningún problema en tomar a iniciativa e propoñer elas o matrimonio ao ratiño.

O contacontos foi moi aplaudido polo alumnado e profesorado asistente, e serviunos para traballar a idea de que "todos somos iguais e podemos facer as mesmas cousas"

ENTROIDO 2022

O pasado venres celebramos o ENTROIDO logo dunha semana seguindo os mandatos do MECO. Canta cor había no cole. Deixámosvos aquí as fotos da semana.

NO DÍA DE ROSALÍA COMEMOS CALDO DE GLORIA

Polo DÍA DE ROSALÍA non se libraron na cociña de celebrar o día cun xantar especial.

Fixeron o CALDO DE GLORIA.

Mesmo se decorou o comedor para tal ocasión.

Pedíronse os mantéis co poema de Rosalía MIÑA CASIÑA, MEU LAR, que da pé a facer este caldo tan apetitoso, á FUNDACIÓN ROSALÍA DE CASTRO para que todos os nenos e nenas puidesen telo e lelo.

PREME NA IMAXE PARA VELA MÁIS GRANDE

RECITANDO POEMAS NO DÍA DE ROSALÍA

O alumnado de 5ºB recitou uns poemas de Rosalía sacados do Libro do A AO Z CON .... ROSALÍA, da Editorial Everest.

Para o vídeo crearon as súas propias ilustracións.

Agardamos que vos guste!!

RECOMENCACIÓNS PARA FEBREIRO: O MES DE ROSALÍA

AQUÍ VOS DEIXAMOS A VISTA DO NOSO EXPOSITOR DE LECTURAS PARA ESTE MES

ENCONTROS COA AUTORA

Hoxe 14 de febreiro veunos visitar ANDREA MACEIRAS, autora do libro A FOLLA AZUL.

Esta actividade de ENCONTROS CO/A AUTOR/A está dentro das actividades educativas do CONCELLO que se ofertaban para 5º de primaria.Para participar nesta actividade recibimos para cada neno/a e as profe o libro e na hora de ler aproveitamos para unha lectura conxunta do libro e así gozar en grupo das aventuras da protagonista.

Andrea Maceiras convidounos coa súa visita a unha pequena viaxe pola Amazonia para coñecer un pouco mellor o mundo e a tribu na que se inspirou o seu libro. Logo deu paso ás preguntas que lle fixeron os nenos e nenas sobre a súa faceta como escritora e sobre as inquedanzas que lles xurdiron coa lectura do libro. Finalmente asinou os libros de todos e todas e puidemos facer unhas fotos de grupo con ela.

Todos os rapaces e rapazas coincidiron en que lles gustou moito e que lles encantaría que houbese unha segunda parte.

MOITAS GRAZAS ANDREA.

EMPATIZANDO COA DIVERSIDADE

Co gallo da celebración do DÍA DA DISCAPACIDADE realizáronse no cole unha serie de talleres da man de LIDIA e PATRICIA.

Os máis pequenos tiveron un taller de LINGUAXE DE SIGNOS para coñecer como se comunican as persoas xordas.

Os maiores puxéronse na pel dunha persoa cega. Cuns lentes comprobaron como se sentían vendo pouco ou nada, coñeceron o método BRAILLE para ler e escribir e viron os recursos que pode empregar unha persoa invidente para desprazarse.