Un ano máis a Delegación do Goberno en Galicia e a Alta Inspección de Educación puxeron en marcha o PLAN DIRECTOR PARA A CONVIVENCIA E A MELLORA DA SEGURIDADE  NOS CENTROS EDUCATIVOS E NOS SEUS CONTORNOS. O principal obxectivo do mesmo é o de mellorar a convivencia nos centros e na comunidade educativa, fomentando valores de respecto a partir da prevención e da información en temas como: acoso escolar, novas tecnoloxías, violencia de xénero, drogas e alcol... Estas charlas son impartidas por persoal especialista dos Corpos de Seguridade do Estado.

Concretamente ao noso centro acudiu, Lorena, membro da Policía Nacional, que impartiu o día 20 de febreiro unha charla informativa sobre o acoso escolar. Durante a mesma explicoulles aos alumnos e alumnas de 5º e 6º de primaria que era o acoso escolar, onde ocorría, cales eran as partes implicadas no mesmo: vítima, acosador e observadores. Cales son os diferentes tipos de acoso: físico, psicolóxico, verbal, social, sexual e ciberacoso; así como as medidas a adoptar en caso de ser vítima ou observador dalgún problema de acoso no centro ou no seu contorno. Logo os rapaces e rapazas interactuaron con ela formulándolle preguntas e contando as súas vivencias con respecto a este grave problema. 

ENLACES:

- BREVES PAUTAS PARA PAIS E NAIS SOBRE COMO ACTUAR ANTE O ACOSO ESCOLAR E O CIBERACOSO.

- CONSELLOS DO PLAN DIRECTOR PARA O ALUMNADO.

O martes 19 de febreiro alumnos e alumnas de 5º de primaria acudiron ao Liceo de Ourense para asistir ao encontro coa escritora IRIA MISA, unha das xoves escritoras galegas de literatura infantil e xuvenil. O encontro enmárcase dentro da actividade ENCONTROS CO AUTOR/A promovida polo CONCELLO DE OURENSE co fin de poñer en contacto directo aos nenos e nenas cos autores e ilustradores e dar de coñecer de preto o seu traballo.

Como paso previo a este encontro os alumnos de 5º leron nas aulas o último libro da escritoria:  MAMÁ, QUERO SER ZIGGY STARDUST, libro no que se trata o tema do respecto ás diferenzas coa historia de Aine, que aínda que naceu con corpo de nena en realidade séntase neno. A sú loita para que a entendan e a acepten tal e como é, e o seu desexo, despois de visitar cos seus pais unha exposición sobre o músico David Bowie, de ser como Ziggy Satardust, o personaxe creado por Bowie, son as claves deste libro que dende o primeiro momento "enganchou" aos nenos e nenas. 

Durante o encontro o alumnado coñeceu en boca da autora como se fraguou o libro, porque escolleu este tema, a súa devoción por David Bowie... a continuación os rapaces e rapazas fixéronlle preguntas sobre a súa vida e a súa obra, e Iago, un dos nosos alumnos, propúxolle o título do seu próximo libro: MAMÁ, XA SON ZIGGY STARDUST, proposta que lle encantou á autora e indicou que tomaría nota da mesma. 

Finalmente asinoulles o libro e fixéronse unha foto con ela para recordar este día tan especial. 

Charla sobre saúde buco-dental: "COIDANDO A MIÑA BOCA", é o título da actividade que se desenvolveu no centro en dúas sesións: unha para o alumnado de 4º de primaria o pasado 7 de febreiro e outra para os nenos e nenas de 3º de primaria o 12 de febreiro. Promovida pola Consellería de Sanidade, os principais obxectivos desta actividade son que os nenos coñezan, partindo do estudo da boca e a dentición, como podemos coidar a nosa boca e evitar enfermidades como a carie: hábitos de alimentación saudables, o correcto cepillado da boca e  revisións periódicas no dentista... axudarannos a manter unha boa hixiene bucal.

Destacar que á charla do día 12 para os nenos e nenas de 3º, acudiu ao centro, ademais da técnica que impartiu as charlas, a Delegada da Xunta de Galicia en Ourense, xunto coa Xefa Territorial de Sanidade e a Xefa Territorial de Educación que coa súa presenza quixeron destacar a importancia que ten o fomento de hábitos saudables para a formación integral do alumnado.

A charla estivo acompañada polo visionado dun vídeo, ademais de prácticas de cepillado e por unha presentación onde destacamos as seguintes imaxes que resumen un pouco o contido da mesma:

Por último destacar a publicación nos xornais La Voz de Galicia e La Región, así como na páxina web da Xunta de Galicia o seguimento desta actividade no noso cole por parte das autoridades arriba mencionadas: 

 ENLACES:

- PÁXINA OFICIAL XUNTA DE GALICIA

- EDICIÓN DIXITAL XORNAL LA REGIÓN

- EDICIÓN DIXITAL XORNAL FARO DE VIGO 

O pasado 12 de febreiro un axente do servizo de SEPRONA (Servizo de Protección da Natureza) estivo no noso centro para impartir unhas charlas sobre a prevención de incendios forestais. Alumnos e alumnas de 1º e 2º de primaria (nunha primeira sesión)  e o alumnado de 4º de primaria (nunha segunda charla), participaron nestas charlas que son promovidas dentro do programa VOZ NATURA. Os obxectivos destas charlas son, en primeiro lugar, que os nenos e nenas coñezan que é a garda civil e que é o seu servizo de protección da natureza (SEPRONA); en segundo lugar, que coñezan como se poden previr os incendios forestais.

Explícanlles como traballan no seu labor continuo de protección do medioambiente e logo as charlas céntranse na loita contra os incendios forestais: as causas dos mesmos, as súas consecuencias, como podemos previlos e por último como debemos actuar ante un incendio, tamén o que non hai que facer nunca. Todo isto acompañado dunha presentación e con intervencións por parte dos nenos e nenas que non deixaron de facer preguntas e contar as súas experiencias sobre este grave problema da nosa contorna. 

O pasado mércores, 6 de febreiro, saímos no xornal!!! No suplemento XORNAL ESCOLAR do xornal LA REGIÓN,  fíxéronse eco das actividades que realizamos con motivo da celebración do DÍA da PAZ e do DÍA da EDUCACIÓN AMBIENTAL, algunha das cales xa vos contamos nunha anterior entrada.  

Como xa sabedes, dende o pasado curso, o IES EDUARDO BLANCO AMOR é o instituto ao que está adscrito o noso centro, é dicir, é o instituto que lles corresponde por zona aos alumnos e alumnas que rematan 6º de primaria no noso colexio.

Para que todos podades coñecer as súas instalacións, o seu plan de estudos, proxectos, actividades... dende o citado instituto, o seu director invítavos a unha xornada de portas abertas o vindeiro 13 de febreiro ás 20:00 horas. Todos os pais, nais e/ou titores legais dos rapaces e rapazas de 6º de primaria estades invitados a asistir.

 E recordade que o vindeiro 15 de febreiro remata o prazo para facer a reserva de admisión se queredes que os vovos fillos e fillas continúen os seus estudos de secundaria no IES E. BLANCO AMOR. 

Xa podedes consultar no documento adxunto as bases do III CONCURSO FOTOGRAFÍA A METEOROLOXÍA: O INVERNO. Recordade que este curso o noso concurso anual de fotografía ten tres edicións: unha xa celebrada, a correspondente ao outono, a presente, dedicada a fotografar a natureza no inverno e haberá unha terceira edición adicada á primavera.

OBSERVADE OS CAMBIOS QUE SE PRODUCEN AO NOSO REDOR NO INVERNO E FOTOGRAFADE AQUILO QUE MÁIS VOS GUSTE OU VOS CHAME A ATENCIÓN DESTA ESTACIÓN. ANIMÁDEVOS E PARTICIPADE!!!

Na semana do 28 de xaneiro ao 01 de febreiro celebramos no colexio diversas actividades con motivo da celebración o 30 de xaneiro do DÍA ESCOLAR DA NON-VIOLENCIA E DA PAZ, data na que se conmemora a morte do líder pacificista MAHATMA GANDHI. Pretendemos que os nenos e nenas aprendan valores como protección, coidado, solidariedade, diálogo, comprensión, non-discriminación, cooperación ... en contra da cultura imperante da violencia, da discriminación, da forza, do despilfarro, da explotación... 

En consonancia cos proxectos que se levan a cabo no centro (Proxecto Anual: "Entre salgueiros, bidueiros e carballos" e o programa de MeteoEscolas), este ano centrámonos máis en concreto no coidado e defensa das árbores e da natureza. A contaminación, os incendios... están provocando o cambio climático; a explotación indiscriminada da natureza e os recursos, está provocando as guerras nos países máis pobres... e todo isto rematará por acabar coa vida que sustentan a auga, as árbores e os bosques. 

Despois de traballar nas aulas estes valores, destacamos algunha das actividades realizadas en común:

 Os alumnos e alumnas de 5º e 6º de Educación Primaria presenciaron, o pasado mércores, 30 de xaneiro, no Auditorio Municipal de Ourense a obra teatral TARZÁN. Obra en inglés representada polo grupo FACE2FACE e baseada na obra do escritor inglés Edgar Rice Burroughs.

"O coñecemento da lingua inglesa, a superación persoal, o traballo en equipo, os sentimentos e a interacción cos escolares serán algúns dos valores que poderemos apreciar nesta obra.

Inspirado nas novelas de Edgar Rice Burroughs, nesta historia un avión estrélase no medio da selva. O único sobrevivente é un bebé que será adoptado por unha parella de monos e convertirase en Tarzán. Mentres tanto, Jane Goodall, unha documentalista amante da natureza, e o seu prometido, Archibald Porter III, cazador, están de expedición na xungla co seu equipo (persoas afortunadas do público)..." (Senopse extraída da páxina web de AFundación, entidade que organizaba esta actividade).

Xa temos aquí o resultado da terceira edición do concurso "FOTOGRAFÍA A METEOROLOXÍA: O OUTONO".

Na seguinte presentación podedes ver as tres fotos gañadoras máis todas as presentadas.

Grazas a todos pola participación e enhoraboa aos gañadores.

Só recordarvos que está aberto o prazo para presentar as fotografías correspondentes ao inverno. Observade a natureza e os cambios que sofre en cada estación e animádevos a participar!!. 

 Na entrada do colexio podedes ver a exposición de todas as fotografías presentadas